Hissoṅ mein bante hue Hum

Pal pal kar hissoṅ mein baṅṭ rahe hain hum 

Kabhi hindu, kabhi muslim

To kabhi sikh-isaai

Isse bhi na bane to khud ko 

Punjabi, bangali, Gujrati 

Ban kar baaṅṭ rahe hain hum

Apne hi desh mein kabhi uttar ke to

Kabhi dakshiṇ ke ho kar reh gaye hain hum

Aao ek baar mein milkar 

Baaṅṭ dete hain apne jahaṅ ko 

Apne apne dayaroṅ mein simaṭ kar

Apni hi banai jailon mein

Khud ko kaid kar lete hain hum 

Nafrat ki Iss aag se 

Ek ghera bana, usi ghere mein 

Khud hi apne-aap se 

Batiya kar khush ho lete hain hum 

Kya zarurat hai Hume kisi aur ki

Apne aap mein hi sampurṇa hain hum

Hum hi darshak, hum hi actor

Sarvgunsampann hain hum

Roz apne aap ko uṅcha dikhane ki chah mein 

Kitne hi neeche girte jaa rahe hain hum 

Itne nafrat ke beej bokar 

Aane wale jahaṅ ko waise bhi kya dekar jaayenge hum

Aao aaj issi waqt apne mulk ko noch nochkar 

Apni sarahadeiṅ aap hi tay kar lete hain hum

Ruko, ṭhehro, sambhalo....

Thoḍa socho ek baar phir

Chahte kya hain hum

Nafrat ke phal

Ya ek haṅsta hua jahaṅ

Banana chahte hain hum....

#Self